وقفنا
..و وقفنا وإحنا علي بعد خطوتين من بعض
لقينا روحنا بعيد بعد السما م الأرض
سبنا المسافة تزيد واحنا اللي روحنا في بعض
ومشينا و كل واحد فينا رايح في اتجاة
و نسينا إن احنا كنا لبعض ( طوق نجاة)
و بقينا اتنين تايهين واقفين في سكة بعض
ضاع منا اتنين عاشقين قوي بعض
وسابوا لنا اتنين خايفين من بعض
بنخاف م القرب ونرتاح في البعد
ووقفنا واحنا علي بعد خطوتين من بعض
لقينا روحنا بعيد بعد السما م الأرض
احنا اتولدنا يوم ما اتولد الحب البرئ
واخدنا وعد من الزمن يكون صديق
ما أعرفش تهنا ولا تاة منا الطريق
و ازاي بقينا في لحظة في غاية البعد
ووقفنا واحنا علي بعد خطوتين من بعض
لقينا روحنا بعيد بعد السما م الأرض
إزاي بقلوبنا البريئة
ما قدرناش نسامح
وسكتنا
و السكوت جارح
والفراق
بان في الملامح
من غير كلام..
دلوقت مش وقت الكلام
نظرة عيونا قالت :
أخر كلام
وقبل ما تكون النهاية
استعجلنا النهايه
....و سلمنا بإننا
مش لبعض
ووقفنا واحنا علي بعد خطوتين من بعض
لقينا روحنا بعيد بعد السما م الأرض
من أشعاري د/ ماهر محمود
تعليقات
إرسال تعليق