لما الوطن بيثور..قصيدة للشاعر عوض بدوى

قاللي الوطن بيثور.. أنا قلتله إيه ده؟
قاللي الوطن بيثور.. أنا قلتله.. إهـــــدا
ياعم بطل هزار.. وقول كلام غير ده
تلاتين سنه خملان
مذلول وبيطاطي.
وبتحكمه الغربان.. وبحزبها الواطي
وياما شاف من عز.. خرطوش ومطاطي
قاللي خلاص انتفض.. والدنيا اهي شاهده
زمن السكوت انتهي.. وكل يوم منده.
***

الورد واقف في الميدان مارد
وبتقتله ياجبان بدمك البارد
مين اللي قالك ياهُبَل.. إن الورود تتحَـش
إنت اللي زايل وتاجك..
وصولجانك هَـش
واللاتي والعُزه أهم حواليك
لا حد قام ينجدك.. ولا حد باقي عليك..
واقف وحيد منبوذ.. محمي بكومة قَـش
مرفود بفعل الجموع
مرفوض بفعل الجوع
ومن النهارده المباح.. خلاص بقي ممنوع
ومن النهارده التاريخ.. بيسطر الموضوع
فرعون وكنت زمان
دلوقتي آن الآوان..
تبقي البعيد مخلوع.
***
إرحل بقي ياهُـبل.. إرحل بقي ياطور
صحيح معَصلَج وعِنًـدي.. وفي العناد دكتور
وماكنش ممكن تصدق.. إن الورود بتثور..
بركان غضب وانفجر..
طالع يشوف النور
زئير هتافهم يشـيب.. بيكسروا الأسوار..
ويحطموا الطواغيت.. وبيكشفوا الأسرار
آدي الورود طالعين.. المعجونين بالطين..
واتعلموا ف حطين..
وف بدر والياسمين..
وشافوك ياخاين بايعهم.. في القدس وفلسطين
ملعون في كل كتاب..
وف كل مله ودين.
***
باب الجهاد ياجدع.. على مصراعيه مفتوح..
وجنبه سكة هوان.. وصوت خفيض مبحوح
شوف انت فين سكتك..؟
وشوف لفين هاتروح؟
وحط روحك في كفك
حاول تموت.. هاتعيش
صدقني حان الخلاص..
وياروح ما بعدك روح
***
يامصر.. يام الحضاره.. يام التاريخ والنيل
خلوكي ليه محنيه.. جسدك عليل وهزيل
بتموتي لجل الرغيف
والليل طابور ومخيف.
خلوكي ليه عيانه؟
خلوكي ليه غلبانه؟.. متسرطنه وخربانه
وف عبّارات الموت.. مرميه ليه غرقانه؟
متدّفيين في القصور..
وسابوكي ليه عريانه؟
ويشحّتوكي ليه؟.. ويشحطتوكي ليه؟.. ويخصخصوكي ليه؟
مليون سؤال ياوطن..
ومفيش إجابه عليه.
وبيقتي ليه حزنانه؟
وبقيتي ليه خيبانه؟
متعلمه وجهلانه..
وكنتي ست الكل.. خلوكي ليه متهانه؟.
ماتندميش يامصر.. وماتكونيش زعلانه.
***
وماتسأليش.. يامُ الولاد..
ليه الولاد هبوا؟
يمكن عشان اتألموا.. يمكن عشان حبوا..
يمكن عشان في الهوان..
إتولدوا واتربوا
إشتد عودهم خلاص واتمكنوا وشبوا..
وسع طريق للفلول
الطاغي جاي للمثول
والشعب أصل الأصول..
والظالم اللي طغي.. ذنبه على جنبه.
مش كانوا لسه صغار.. وبيجروا في الحاره
سبحانه ده اللي وهب..
حنيه وجســاره.
طبطبي بإيدك عليهم
أحضنيهم
وافتحي قلبك خديهم..
ألف رحمه ونور عليهم.
شوفتهم بعيوني بيحاربوا الطاغوت.
ما استسلموش للذل.. وماهَمْهُمش الموت.
الورد في التحرير.. بينادي ع الياسمين
والدم سايل بيرْوي.. ويعطّر الميادين
رايحين ومش راجعين.. بس النهار راجع
رايحين ومش راجعين..
بس الأمل طالع
غول السكوت بيموت..
والحق صوت طالع..
يكتب في مجد الوطن.. وبيقرا في الطالع
شايف أكيد ع المدي..
هرم الفساد واقع..
لما الوطن بيثور.. يبقي الوطن رائع..
يكْبَر.. مفيش مانع..
يحلم.. مفيش مانع..
يفرح.. مفيش مانع